Сайт АГП: "Івашкевіч падтрымаў Ле Пэна"

Содержание

"Крыніца":http://www.ucpb.org/?lang=rus&open=16084

5.11.2007

На сённяшней прэс-канферэнцыі Віктар Івашкевіч вельмі арыгінальным, як нам падалося, чынам пракаментаваў учорашнюю бойку паміж неанацыстамі і анархістамі падчас Сацыяльнага маршу.

Ён сказаў: _«Гэтыя хлопцы не маюць яснай і адкрытай пазіцыі. Ва ўчорашняй бойцы ўдзельнічалі несур’ёзныя анархісты і фашысты. Да сур’ёзных ім яшчэ расці і расці»_.

На інтэрнэт-форуме «Нашай нівы» на гэты конт пацікавіліся: _«Гэта што – пажаданьні прафэсійнага росту?»_

Уздагон згаданаму прагучаў яшчэ адзін пасаж, яшчэ больш варты ўвагі. У якасці «сур’ёзнага нацыяналіста» Віктар Івашкевіч назваў Жан-Мары Ле Пэна. _«*Гэта грунтоўны палітык, які карыстаецца аўтарытэтам*»_, – зазначыў ён – і далей прыводзіў яго як узор нацыянальна арыентаванага дзеяча.

_«*Спадар Івашкевіч губляе пачуццё рэальнасці. Мяне не здзіўляе, што ў яго могуць быць схаваныя сімпатыі да ультраправых. Але ж нават Зянон Пазьняк не дазваляў сабе праводзіць паралелі з французкімі ксенафобамі, бо гэта проста непрыстойна. Яшчэ больш небяспечна – што падобныя матывы знаходзяць водгук у беларускіх палітычных сілаў, якія называюць сябе дэмакратамі*»_, – заўважыў Міхал Пашкевіч, намеснік старшыні маладзёвай арганізацыі АГП «Маладыя дэмакраты», таксама адзін з арганізатараў «Сацыяльнага маршу», які сёння зранку вызваліўся з-пад адміністрацыйнага арышту і браў удзел у гэтай прэсавай канферэнцыі. М.Пашкевіч лічыць гэтае выказванне настолькі ж непрадуманым, як пасаж Лукашэнкі пра «габрэяў, якія зрабілі з Бабруйска свінюшнік».

Прыгадаем, што спадара Ле Пэна шмат хто ў Еўропе называе палітыкам неанацысцкай скіраванасці. Калі ён аднойчы выйшаў у другі тур прэзідэнцкіх выбараў (які пасля з трэскам прайграў) – па Францыі пракацілася хваля дэманстрацыяў, роўных якім па шматлюднасці не было з часоў заканчэння Другой Сусветнай вайны.

Пракуратура Францыі ўзбуджала супраць Ле Пэна справу за «заклікі да расавай нянавісці». Гэтаксама яго пазбавілі мандата дэпутата Еўрапарламента за тое, што ён накінуўся з кулакамі на жанчыну, якая спаборнічала з ім падчас перадвыбарчай кампаніі. Сваёй ваяўнічай ксенафобіі – г.зн., нянавісці да прадстаўнікоў іншых нацыяў – Ле Пэн і не хавае.

Powered by Free Software, including Ruby programming language, PostgreSQL database. Samizdat engine is free software; you can distribute/modify it under the terms of the GNU General Public License version 3 or later.