Увесну гэтага году ў Венесуэлу выехала працоўная група архітэктараў "Белпрампраект" з мэтай правядзення перадпраектных і праектных прац у межах праграмы супрацоўніцтва Беларусі і Венесуэлы. Нагадаем, Інстытут Белпрампраект - дзяржаўнае прадпрыемства, якое займаецца праектнымі працамі ў галіне прамысловай і грамадзкай архітэктуры. Менавіта адмыслоўцы гэтага інстытуту распрацоўваюць лядовыя палацы на загад прэзідэнта.

Па прыезьдзе ў Венесуэлу ўсе дэлегацыі зь Беларусі стараюцца пасяляцца ў пяцізоркавым гатэлі, бо ў любым гатэлі ніжэйшай катэгорыі пражываць папросту небяспечна для жыцця: у 9 выпадаках з 10 замежны турыст, нават сярод белага дню, рызыкуе быць забітым ува ўласным нумары, калі ён пражывае без аховы, а аховай забяспечваюцца толькі пастаяльцы пяцізоркавых гатэляў.

Але ўсе прынятыя меры перасцярогі не ўратавалі беларускіх архітэктараў. На дэлегацыю быў зьдзейсьнены ўзброены напад са стралянінай. У выніку, адзін з архітэктараў быў цяжка паранены і толькі цудам застаўся ў жывых.

Зараз дэлегацыя вярнулася ў Менск. Тут гісторыю спрабуюць замяць. Але архітэктары з праектных інстытутаў напужаныя. Асаблівую іх насцярожанасць выклікае той факт, што ў Венесуэле дзейнічаюць уласныя праектныя інстытуты, а беларускія праектныя інстытуты нават грошы за сваю працу ў Венесуэле не атрымліваюць, бо дамову аб выкананьні праектных паслуг заключалі не яны, а ўрады Беларусі і Венесуэлы.

Узнікае пытаньне : навошта пасылаць беларускіх архітэктараў у такія ўмовы, дзе ствараецца пагроза для іх жыцьцяў. Найбольш імаверная вэрсыя : камандзіроўкі беларускіх архітэктараў - прыкрыцьцё для неафіцыйнага гандлю зброяй паміж Беларусью і Венесуэлай.