Суботнім вечарам 18 чэрвеня ў сталічным клубе "Салтайм" насупраць Нацыянальнай бібліятэкі мусіў прайсці канцэрт Plyama & Indigo, LIL'FILL, Y.B. Hooligans і іншых гуртоў, якіх у інтэрнэце асацыююць з ультраправым рухам.
Неспадзявана іх атакавалі невядомыя.
У клубе “Салтайм” кажуць, што канцэрт так і не распачаўся. Па словах супрацоўніцы клуба, ніхто не пацярпеў – хутка з’явіўся міліцыянт, які выклікаў АМАП. Але хуліганы паспелі пашкодзіць мебель звонку.
“У нас побач бар, наведвальнікі спужаліся, у некаторых быў шок, мебель пашкодзілі, пару крэслаў, сталы перавярнулі. Паказвалі сваю сілу! Дзякуй Богу, тыя хлопцы, што спрабавалі арганізаваць мерапрыемства, не выйшлі на вуліцу. Выйшаў наш арт-адміністратар. Ён вельмі спужаўся.”
Супрацоўніца клуба кажа, што, хутчэй за ўсё, ў масках былі людзі, якія спісалі ўвесь раён абрэвіятурай “МТЗ” (антыфашысцкія фанаты ФК “Партызан” – Еўрарадыё).
З іншага ж боку былі ультраправыя фанаты “Дынама” (Мінск), якія ўжо абмяркоўваюць інцыдэнт на сваёй гасцявой madeinminsk.unoforum.ru.
Супрацоўніца клуба: “На канцэрт прыйшлі прыстойныя, нармальныя хлопцы ўзросту 23-25 гадоў. Чалавек 40. Некаторыя засталіся, падтрымлівалі нашага адміністратара. Яны навучаюцца ў вну. Сказалі, што з іншага боку было 50 чалавек. Можа з-за страху перабольшылі”.
Людміла з суседняга дома бачыла, калі ўжо ўсе разбягаліся.
Людміла: "Там былі хлопцы ў чорным майках і масках. Калі не памыляюся, на майках было напісана "Хеўра". Чалавек дваццаць. Ляцелі, усіх збіваючы на сваёй дарозе! За імі пабег міліцыянт з апорнага пункта".
Пасля таго, як за невядомымі пабеглі міліцыянты, каля 70 наведвальнікаў клуба, малая частка з іх – дзяўчаты, збудаваліся ў шыхт і ўсе разам пайшлі ў метро. Усю дарогу іх суправаджаў міліцыянт. Неўзабаве пад'ехаў аўтобус са спецназам.
Людміла, якая жыве ў доме насупраць, хвалюецца за сябе і блізкіх з ёй людзей. І таму паспрабавала высвятліць дэталі здарэння. Па яе словах, міліцыянту з апорнага пункта, які выйшаў на крыкі ля клуба, давялося нават выцягнуць свой пісталет і па рацыі перадаваць пра магчымы напад на супрацоўніка міліцыі.
Наколькі вядома, 20 чалавек затрымана і сёння над імі чакаецца суд.
У судзе Першамайскага раёна Мінска ніякіх каментароў наконт інцыдэнту ў “Салтайм” не далі.
Источник euroradio