У ноч на 21 сакавіка моладзь у намётавым гарадку на Кастрычніцкім пляцы трымала выпрабаваньне холадам і вільгацьцю – уначы тэмпэратура сягала -7, ранкам пайшоў вялікі сьнег. Як зьберагчы здароўе, жывучы на вуліцы ўзімку? Досьведам дзеліцца прафэсійны альпініст Валянцін Акудовіч.

Намёты. Каб засьцерагчыся ад намаканьня, трэба пад намёт ці яго сярэдзіну пасьцяліць поліэтылен. Калі тэнт працякае, то зьверху таксама пажадана накрыць кавалкам поліэтылену – гэта і цяпло зьберажэ. Паветра ў сярэдзіне можна нагрэць адной сьвечкай. Варта памятаць, што самае халоднае месца ў намёце – падлога. Таму проста неабходна паклапаціцца пра наяўнасьць дыванка!

Вопратка. Цёплыя рэчы. Пажадана некалькі зьменных камплектаў (абавязкова некалькі параў цёплых шкарпэтак, сьвежыя шкарпэткі неабходна апранаць перад сном). Каб засьцерагчы ногі ад холаду, паверх шкаркэтак трэба адзець цэляфанавы пачак. Цэляфанам можна накрывацца ад сьнегу, ён таксама добра захоўвае цяпло. Спаць неабходна ў шапачцы, пажадана вязанай. Вопратка мусіць быць цёплай і ў той жа час па магчымасьці вольнай, каб нідзе нічога не перацінала, асабліва падчас сну.

Харч. Раз на дзень проста неабходна гарачы суп. У такіх сытуацыях ён лепей сагравае і засьцерагае ад абязводжваньня. Можна прыносіць з сабою кіпень у тэрмасах і булёны, ці хутка-супы. Плюс гарачая кава і гарбата.

Што рабіць, калі пачынаеш мерзнуць. У такіх выпадках трэба рабіць кругавыя рухі рукамі і нагамі. Гэта палепшыць кровазварот і дапаможа сагрэцца. Але ня трэба забывацца пра тое, што варта берагчы энэргію. Таму парухаліся, сагрэліся, і на нейкі час спыніцеся. Неблагі варыянт – рухавыя гульні, ці танцы пад музыку.

Варта сачыць за дыханьнем, бо на халодным паветры вельмі хутка можна застудзіць горла.

Спаць у намёце варта галавой да выхаду – у выпадку нападу так прасьцей зарыентавацца і выбрацца з спальніка.

Галоўнае – цёплая вопратка, гарачая ежа і сіла духу!